最近好多朋友問我，喂佬訊，政府連堂食都禁埋，冇得work from home的打工仔，應該點食飯？
首先，佬編代政府問大家一個基本的問題，點解你要食飯？
覺得youtube廣告好煩，你可以quit youtube，同理，疫情之下，大家可以quit食飯，光合作用就可以了。雖然市面上仲有大量免檢疫的中港司機、船員通街走，但食肆無晒堂食，市民忍一忍唔好食飯，一定可以早日戰勝疫情的。
But in case你真係需要食飯，而公司又不准飲食，咁又可以點做？Well，恭喜你，過去多年苦練的深蹲，今次終於大派用場。在卅廿幾度高溫之下踎係街邊食飯，不單止考驗體能與耐熱能力，更是對腳力、core、背肌，以及下身柔軟度的終極考驗。
一盒叉鴨飯（加薑蓉），食得再快也起碼要十五分鐘。一手捧飯，一手食飯，對於穩定性及耐力有頗高的要求。所謂力從地起，結實有力的下盤，將是成功食飯的關鍵。記得背脊要直，身體切忌烏得太前，避免對下腰做成不必要的負擔。
當然，踎係街食飯除了考驗體力，亦是精神力及恥力的試驗，未必是所有人都能接受得到的。如果你不想踎街，可能就要考慮找個地方坐低了。公園是最obvious的選擇，但不少大熱公園，在上星期禁晚市時已有爆滿的跡像，諸君去到自己執生。
手頭寬鬆一點的，建議直接開房食。這個option，佬編也是最近才受啟發想到的，平時開房通常都冇時間食飯，但大家應擴闊對開房的想像。既然素未謀面的網友可以開房拍AV、玩SM、開Live，為甚麼就不能開房食飯呢？
當然，佬編這篇文章，大槪很快就會發揮作用，所以諸君見字請立即book房，提早預訂明天後天中午時段的房間。
Daytime booking通常都起碼兩粒鍾，食得快的話，仲可以瞓晏覺。豪爽一點的，甚至可以在公司/工作地點附近長期book間房，反正現在酒店房也不算貴，還可以lunch time帶個相宜的同事返房一齊食飯。
講下講下，佬編都開始肚餓了，有冇靚女可以借間房一齊食飯？心急，在線等。
Search